地水南音 -《男燒衣》

 

《男燒衣》
原為清代的南音曲目, 內容講述一男子愛上了廣州珠江口一艘花艇船舫的歌妓, 自因公離開廣州後, 歌妓為錢債所困, 輕生自盡, 這個多情恩客回來, 得悉此賣唱歌妓身故後, 懷念往日情緣, 僱小艇出海祭奠, 燒金銀衣紙, 大屋, 婢僕, 呼喚亡魂鑒領, 每燒一件物品便勾起對這位情人的思念, 正哭得聲嘶力竭淚如雨下, 艇娘聞聲不忍, 上前搭訕, 安撫做媒, 重渡鵲橋, 使他化悲為喜。得艇嫂安慰後, 把這癡情男子棹回上岸, 一曲結束人鬼情。

【男燒衣】白駒榮 (字幕圖解版) By Oiman Chan

唉呀聞、聞得妹話，話死哩，實見不安！唉妹 啊妹，妹你所因何事呢，自縊懸樑？人話你死咯，思疑，唔信講啊，今日果然妹死去啊，實慘傷！唉妹啊妹，妹你死嘅因銀幾十兩啊，把我舊情一旦付落水茫茫，唔望與嬌彈共唱，唔望、唔望叫艇、叫艇遊河賞喱嗰珠江，唔望、唔望八月、八月中秋同把月賞，唔望龍舟佳節共你看龍航，我話身契、身契贖返同妹你上岸，唔仲、我話應承兩個月咁就帶你從良，妹啊，即係怨恨幾尺紅羅將命喪，縱有、縱有黃金萬兩難以買你還陽，喱陣天跌一個落黎唔慌我想啊，人話、人話靚時唔似我妹，妹啊你靚得咁心傷！今晚夜、今晚夜月明星又朗啊，等我叫只、叫只小舟來把陸放，唉願妹你、願你早登仙界上慈航。

忙解纜，往江濱，又見、又見江楓漁火、漁火照住我愁人，各物擺齊兼果品，妹啊你前來鑒領、鑒領我情真！燒頁紙錢將妹你、你嘅靈魂引，妹啊燒到衣裳、首飾就共金銀，燒到、燒到丫環一對、妹啊來親近，嗱你落去呢、服侍主人要小心，佢高聲叫你、你要、你要低聲應，切勿頑皮駁嘴啊激、激主人，燒到鎖匙一大能(串)，古人各物係你關心，燒到嗰盒、嗰盒胭脂和水粉，燒來兩套乃係百褶羅裙，燒到鍾籠鬼子台、鬼子台、與共酸枝凳，燒到刨花搽油、茶油文，燒到揀妝一個、妹啊你、照住你凜冽嘅孤魂。

燒到芽蘭帶，與共、與共嗰對繡花鞋，可惜花鞋繡到美麗咁精乖！妹啊芽、芽蘭帶、芽蘭帶小生親手買，我應承兩月就帶妹你住埋！唉！妹呀幾十兩嘅紋銀係你、係你、係你攞命債！咁樣無辜把妹你命嘥！妹啊我話帶時一定帶，應承回家之後就帶你埋街！我話、我話回來共妹你還通債，咁樣相思無聊賴！相、相思啊無、無聊賴！妹呀妹，慘過、慘過孤舟無咗軚，點得妹啊夢魂相會共我解襟懷？！

唉燒到、燒到紅羅帳、與共象牙鉤，妹啊！燒來一對乃係顧繡枕頭，哎呀唔望鴛鴦同、同聚首，見物思人慘把魂鉤！妹啊你在啊你在黃泉曾否念舊？兩家情、情愛有無付水流？唉 !燒到、燒到白銅煙帶與共銀鏈扣，人話水煙至靚出在蘭州，咁你無事可叫丫環裝兩口，得來陰府你要解煩愁。燒到煙槍鋼托仲有雷州兜，又來燒到鉸剪、煙鉤，燒到燈局一盞光明透，但凡燈暗妹啊拂被都添油，妹啊妹，我有公煙一盒原本係舊㗎，等你黃泉下邊解煩憂，無事清閒燂兩口，陰曹地府你要解煩愁。

妹啊燒到各款交你手，你謹防門戶切勿被人偷，唉燒到燒衣一套唉情痴呆啊，喉咽嘔，點得妹啊共你黃泉敘首？點得霎時相會妹啊在抬頭？！

忙酌酒，奠過、奠過妹你粧台，妹啊你有靈有性鑒領情杯，小生為你呢真係肝膽碎！點得霎時相會我哋妹妝台！唉！哭極咁多唔見你會，莫不是你將吾情義比較呢個薄幸嘅王魁？小生為你茶飯不思情癡妹啊，妹啊我胸前一拍、生就氣死在靈台！

哎呀又到艇嫂佢上前同君抹淚，叫聲(白：大相啊、大相、大相啊)你咪咁悲哀，人話男子心腸多變改，唉吔，我睇君你情義確係無人陪，

蠟燭替君流血淚，你咁、你咁多情啊，等我同你揾個係靚過花魁。多情愁無多情配咩？你咁多情等我共你做媒。大相啊，你快些、抹幹銀淚上岸咯，老身立即棹你回。(白：咁你坐穩艇喇)

我忙轉軚，快如雲，雙槳齊搖海面奔，海闊(白：今晚風狂喎)阿大相你坐穩啊，奴奴共你細談陳，喱我哋隔離街喎有個係逢人恨，佢腳又細時滿手黹針，年方二八又識書禮啊，(白：佢好靚㗎)詩辭歌賦件件皆能。喱因為前者有位少爺把佢婚姻問，(白：佢就唔肯喎)佢要揀多情男子正合得佢心，佢話 多情要揀多情襯 (白：咁話喎)，多情人子佢就不拘禮銀，佢話兩家係真情喎，至得煙韌(白：咁話遮)，男情女義合相登。離舟登陸咯啊(白：啊大相)你要行穩，保重要緊，保重要緊。咁就鵲橋高𣕧，續返你嗰對有情人。