【地水南音】
南音是始於清末民初, 源自昔日粵, 港, 澳與珠江一帶的 [彈詞], 像今天的說唱 Rap 方式來抒發個人的坎坷, 敍述一些民間故事與現况, 甚得坊間眾多人士所接受。
【地水南音】是南音的一種, 流行於香港開埠初期的煙館, 茶居, 妓院煙花之地, 不少曲詞以迎合這些場合的人士, 多涉及色情的題材, 故俗稱 【老舉南音】。當時的茶樓為招徠顧客, 皆爭相邀請瞽師藝人演唱, 後來演變成粵曲歌壇。直至1935年, 香港全面禁娼, 地水南音亦逐漸式微, 偶爾可聽到一些失明人士仍以南音賣唱為生。茶樓賣藝與電台的地水南音播放也於七十年代起消失, 香港最後一位就是杜煥瞽師, 1972年離開香港電台之後, 祇靠街頭賣唱维生。
很多人認為賣唱的瞽師多都操占卜業的失明人士,「地水」亦是占卜術中的"師卦"之稱, 為免却直稱盲人的忌諱, 故把卦名「地水」轉為師傅的尊稱。另一說法則是以前廣州人習慣稱呼盲人做 "阿水", 如有謂 "佢係乜水?", 因這避忌, 故稱男的為瞽師, 女的為師娘。亦有人認為「地水」是指廣東沿海, 活於水陸之間的艇户人家, 有失明人士因不便外出, 他們多寄居於艇上業占卜, 問米或賣唱為生, 而比較接近此說法的, 就是南音之中很多腔調與一般水上人家的"俚語"極為相似如【女燒衣】的曲詞。 瞽師、師娘、多習占卜、賣唱; 而業按摩, 則視乎年齡與體力, 才成為另一謀生技能。失明人士以師徒之間互相扶持, 口授耳傳與徒, 老邁時要依靠徒弟過活, 如沒有後輩可傳, 則不能延續下去, 至淪落街頭賣唱為生, 實為可悲。南音之中所及的粵語文化甚廣, 優雅與俗套之詞彙甚多, 甚至市井粗俗的亦有, 可惜現今很難承傳下去, 除了一些收藏家仍有保留部份的錄音與文獻外, 已幾近絕跡了。
美國 University of Pittsburgh 匹茲堡大學 音樂系榮鴻曾教授, 1975年來港收錄了杜煥在上環水坑口, 富隆茶樓演唱的南音曲目十六首, 部份經由中文大學輯錄成唱片《訴衷情》。及後，在唐健垣安排下, 杜煥於大會堂劇院演唱, 又被應邀到中文大學博物館內作南音演唱, 並且拍攝成一卷八米厘影片, 成為傳統地水南音的少數僅存影像紀錄。
【女燒衣】又名【老舉問米】這版本少在坊間聽到
主唱：杜煥曲詞講述: 妓女楚英, 念念不忘身故的恩客蔣金良, 找問米婆通靈覓愛郎。
所謂男與女，呢一個情字每 ﹣每輕，
男人有義啦，所謂女亦有情。
今日係唱來人 ﹣人生一定?
當日呢，有個妓娘叫 ﹣叫做楚英。
皆因佢係交接有一個情郎真 ﹣真合心與性喎。
唉，誰知不幸呀佢箇個情郎早已喪陰靈。
使佢思量日夜啦，唉成咗單思病呀，
日來茶飯不思 ﹣總嘅唔聽。
人話啦，死後若想係再談情需愛問省呀，
待奴心事訴郎聽。
聞得喎有一個 ﹣一個問米婆，住响 ﹣住响我哋姨娘艇呀，
姐妹 ﹣姐妹人人話佢十 ﹣十分靈。
奴去問省呀，老娘瞞過啦，咁就去講真情。
哎吔我咁瞞 ﹣瞞過呢個養母呀。
（楚英）: 阿媽！
（養母）: 做乜嘢呀豬乸？
（楚英）: 我去探姨娘
（養母）: 哎呀，咁你要早啲返嚟坐凳先至得?，你個衰鬼吓，呢排總 ﹣總唔
接客，做乜傢伙？
唉，我帶淚含愁出外方
叫隻小舟呀搖我往
（艇家）：呀，去邊處呀姑娘？
唉，咁你快些棹我呀過珠江
哎吔咁就艇嫂聞言將跳板放
（艇家）：好聲行呀吓！
連忙相聚互過船艙。
不覺舟人忙打槳
呢個艇嫂把小舟棹佢地探姨娘。
不覺就到 ﹣就到舟 ﹣舟人停住槳呀。
（艇家）：嚟到啦！
呀又到姨娘相接禮忙忙
茶煙奉過將言講呀
（姨娘）：哎呀姨甥女！
乜你因何一陣呢係瘦得咁心傷？
究竟你呀有乜嘢 ﹣有乜嘢在身唔妥當呀
點解呀你瘦成 ﹣瘦成咁樣？你身為妓女懶梳粧
脂粉哎吔唔搽究竟整乜嘢戇呀又
我睇真容貌呀 ﹣呀姨甥女
（姨娘）：甥女呀！
點解骨 ﹣骨瘦皮黃
唉，箇陣嬌答一聲
（楚英）：姨母呀！
非別樣
（姨娘）：做乜嘢呀？
我為憶呢個情郎命短，唉，使我日夜唔安
唉我茶飯呀都唔思，瘦成 ﹣瘦成咁樣咋
我今到此係探姨娘
一則係到來姨母你探訪呀
因為幾久我唔曾向你嚟問安
二另今日係到嚟艇上呀
我聞得你艇內呢，有一位係問米娘
姊妹嘅人人話佢靈就靈得妥呀 ﹣妥當呀
重話佢靈到十足事事嘅真裝
今日，唉到來非別樣呀
有請呢個問米婆，共我係請呀情郎
啊，箇陣姨母聽聞，哎吔真正混帳呀
（姨娘）：乖女呀！
你們一定他日有個妓女牌坊
人話啦箇啲青樓喎，車歪咁樣?
若吔，原來我姨甥女你係咁情長
（姨娘）：好啦！
咁我請過 ﹣請過問米婆，嚟到同女你講呀
（姨娘）：你唔使喊！
等我立即喎，請佢 ﹣請佢出嚟相會，然後細說端詳
呀乖女咁你呢話名話姓住址何方
嬌答唉我個情郎生姓蔣呀
就係西 ﹣西關人氏，佢個名呀叫做金良 ﹣良 ﹣良
啊！米婆聽罷佢就將香上
（問米婆）：你坐定呀吓，等我請嚟啦！
燒符唸咒喎在 ﹣在船艙
請到呀引魂童子即下降喎
請到係帶魂童 ﹣童子人你到壇場
請到枉死城將命放
請到街坊土地共城隍
好啦請罷一番米婆待喺神台上喎
自言 ﹣自言兼自講呀
見佢登時一陣係面帶青黃
好啦，忙舉步呀，落 ﹣落陰行
一心話尋搵嗰位姓蔣忙奔
沿路茫茫真 ﹣真惡搵?
米婆佢話落到去查問過晒箇啲地 ﹣地方神
係啦實便尋來皆唔見
唉呢個三娘五在着緊十分
不覺查到奈何橋忙接近呀
奈何橋上，好啦尋到箇個姓蔣亡魂
三娘將佢呢，將佢姓名問呀
問過死生時日呀都冇嘅差分
蔣亡便答，吓你何須將我問呀
乜你為何攔住待橋生
啊！米婆答話哩非別故嘅
因為壇中嚟咗你個有情人
昔日青樓煙花地
有個妓娘為你哩好情真
快些 ﹣快些將我近
等我帶你 ﹣帶你上壇相會你個舊知心
生到壇前求接近咯
又見 ﹣又見我哋知心旁立呀淚 ﹣淚紛紛
生就 ﹣生就把白米拎來在手上呀
連忙抛去妹衫襟
妹呀 ﹣妹呀，難得你咁 ﹣你咁有心來把我問呀
煙花場上算你第一個情深呀
妹呀海上嘅易求無價寶呀
娼寮難 ﹣難搵妹呀你咁有情人﹣人 ﹣人
唉，妹呀，可 ﹣可惜你咁有情有義煙花困
你早日 ﹣早日揀個多情男 ﹣男子呀共你 ﹣共你贖身
妹呀今生今世自問同你冇緣份
小生壽夭難以享受呀妹，妹呀你有情人
唉，妹呀，你早日別卻娼寮離花粉呀
你我係愛情休記恨
你早日唔使當娼為下等呀
願你青樓早日別風塵 ﹣塵 ﹣塵
唉，嬌聽罷喎，叫句 ﹣叫句情哥
哥呀，一心指望咯，你帶我脫災磨
唉，誰料薄命箇啲女人邊個似我
未得 ﹣未得哥呀埋街帶我，我就剋死了哥呀
哥呀，願你早日保祐我就離災禍呀
自從死後我食少愁多
今日請 ﹣請你上壇來講過
我但得 ﹣但得離災禍，我勢唔跟第個
我寧願齋台食素係永念 ﹣永念彌陀 ﹣陀 ﹣陀
唉，不怕蔣亡聽呀，叫句我哋妹粧前妹呀，
（蔣金良）：乜你咁呆呢？
你何食素係咁迷癡
唉想你竹葉 ﹣你竹葉咁青，
愁 ﹣愁冇安樂嘅日子咩
使乜齋堂食素去委尼 ﹣尼 ﹣尼
唉，陰陽隔別咁就難共你再親切呀
妹呀，唔能共你再效于飛
唉，總係妹呀，你有心來 ﹣來問，我就吩咐呀你
願你娼寮早日花粉呀別離 ﹣離 ﹣離
唉，妹呀總係 ﹣總係跟佬埋街呀，千祈咪話貪靚仔呀
千祈咪貪風月唔受迷癡
唉你顧住世人腹 ﹣腹有蜜，口有蜜言腹有劍
你還須記住箇啲巧語花言
唉，你千祈咪一時受了人家騙呀
願妹娼寮醒定好自為之
唉，虧我講不盡 ﹣講不盡世人心裡事呀
你從頭考過未至便宜
係啦講不盡 ﹣講不盡世人心裡事呀
妹呀，我時辰已夠返落陰司
嬌答一聲哥呀你唔 ﹣唔好去住呀
我有好多言 ﹣言語未講郎知
係啦陰魂一去咁就難 ﹣難留住
嬌嬌頓首淚呀如珠
咁佢長嘆一聲哥呀 ﹣哥呀忙氣死呀，跌在塵埃地呀
登時嬌姐氣到面轉黃泥 ﹣泥 ﹣泥
哎吔姨母嚇到係警慌唔少呀
連忙行近抱起這嬌姿
開聲連叫幾句姨甥女呀
（姨娘）：阿姨甥女呀！
姨甥女，從容抖過啦聽我言詞
哎吔夫妻好極都係同林鳥咋
女呀難到來時各自飛
得快樂時應快樂噃
女呀！唔係到老方知恨悔遲
哎吔，你個情郎聲聲教你咯
叫你青樓早日見機
早日揀個係知心人帶你噃，勸女係毋需就記戀佢
責怪人世之中難免死?
即分來早係共來遲
（姨娘）：哎吔阿乖女呀！
你姨母今年係六十都有呀四
週時搽吓粉蕩嘅胭脂
你個係姨丈咁就舊年歸逝去
七旬我都未做咋就快講佳期
（姨娘）：哎吔！阿姨甥女！
你今年正話十九歲幾呀
而家係唔快樂問你等何時？
你想跟佬埋街就容乜易
姨娘共你揀個好相知
係啦，揀個有功名有面子
眉清目秀就好男兒
做大婆係啦唔做妾侍
以免日後畀人欺，兩家住埋包你到尾，早早三年生 ﹣生番兩個仔呀
箇陣安枕 ﹣安枕無憂
乖女呀，箇陣白髮齊眉。